Чăваш чĕлхи кунне, И.Я.Яковлев çуралнăранпа 173 çул, И.Я.Яковлев «Чăваш халăхне» халала çырнăранпа 100 çул, çĕнĕ чăваш çырулăхне туса хунăранпа 150 çул çитнине халалласа ака уйăхĕн 19-25-мĕшсенче Эйпеçри пĕтĕмĕшле вăтам шкулта тĕрлĕ мероприяти иртрĕ: 5-11-мĕш классенче вĕренекенсем «Иван Яковлев çамрăксен чĕринче» фильм пăхрĕç, 5-7-мĕш классем хушшинче И.Я.Яковлев калавĕсем тăрăх тунă ÿкерчĕксен конкурсĕ, 6-7-мĕшсем класра вĕренекенсем хушшинче «Чăваш поэчĕсен сăввисене чи илемлĕ сăвă вулакан», 8-мĕшсем хушшинче «И.Я.Яковлев чăваш халахне» халала илемлĕ вулакансен», чăваш чĕлхи çинчен хатĕрленĕ видеороликсен конкурсĕ пулчĕ.
И.Я.Яковлев «Чăваш халăхне» халала çырнăранпа 100 çул, çĕнĕ чăваш çырулăхне туса хунăранпа 150 çул çитнине халалласа чăваш наци конгресĕн вĕренÿ комитечĕ регионсен шайĕнчи «Çĕнĕ хум» литература конкурсне йĕркелерĕ. Çамрăк çыравçăсен ăмăртăвне ирттерме Чăваш Ресубликин Культура, национальноçсен ĕçĕсен тата архив ĕçĕн министерстви, И.Я.Яковлев ячĕллĕ Чăваш патшалăх педагогика университечĕ тата Чăваш наци библиотеки хутшăнчĕç.
Пултарулăх ăмăртăвне Чăваш, Тутарстан Республикисен тата Чĕмпĕр облаçĕн шкул ачисемпе çамрăксенчен çĕр ытла хайлав килнĕ. Жюри конкурса килнĕ хайлавсене тимлĕ вуласа тухнă хыççăн пултаруллă шкул ачисемпе студентсене тупрĕ, çĕнĕ ятсем уçрĕ, çĕнтерÿçĕпе призёрсене палăртрĕ.
«Çĕнĕ хум» конкурса Йĕпреç районĕнчен Çăкалăх, Пысăк Упакасси, Пучинке, Эйпеç шкулĕнче вĕренекенсем астар хутшанчĕç. Эйпеçри пĕтĕмĕшле пĕлÿ паракан вăтам шкултан 9-мĕш класра вĕренекен Анжела Ильинапа Анжела Филиппова хутшăнчĕç (вĕрентекенĕ Л.П.Школьникова). Литература конкурсĕн тĕп пĕтĕмлетĕвĕ тăрăх Ильинапа Филиппова иккĕшĕ те призёрсен шутне кĕчĕç. ФилипповаА. «Илемлĕ калав», Ильина А. «Иван Яковлев патне çыру çыратăп» номинацисенче палăрчĕç.
2021 çулхи ака уйăхĕн 15-25-мĕш çулсенче Чăваш Республикин вĕренÿ институчĕ Чăваш чĕлхи кунне тата çĕнĕ чăваш çырулăхне туса хунăранпа 150 çул çитнине халалласа «Эпĕ чавашла калаçатăп» акци ирттерчĕ. Акци тĕллевĕ: чăваш чĕлхине упраса хăварасси, аталантарасси, халăх хушшинче сарасси.
Акцие Эйпеçри пĕтĕмĕшле пĕлÿ паракан вăтам шкулта вĕренекенсем те хастар хутшăнчĕç. Уйрăмах вĕсем хушшинче Денисов Б., Матвеева Е., Михайлова О., Артемьев А.(5-мĕш класра вĕренекенсем), 4-мĕш класра вĕренекен Анисимов К., 3-мĕш класри Казаков М. палăрчĕç.
Чăваш чĕлхи кунне халалласа ака уйăхĕн 19-25-мĕшсенче Эйпеçри пĕтĕмĕшле вăтам шкулти 1-7-мĕш классенче вĕренекенсем эрнипех Иван Яковлевич калавĕсемпе паллашса вĕсем тăрăх ÿкерчĕксем турĕç. «И.Я.Яковлев калавĕсем тăрăх тунă ÿкерчĕксен» конкурсне уйрăмах 5-7-мĕш классем хутшăнчĕç, выставкăна илемлĕ ÿкерчĕксем тăратрĕç. Сумлă жюри членĕсене çĕнтерÿçĕсемпе призёрсене палăртма питĕ йывăр пулчĕ. Пурте пĕр саслă пулса I вырăна 7-мĕш класри Пыркина К. Иван Яковлев «Чакак» калавĕ тăрăх тунă ÿкерчĕкне палăртрĕç. Максимова Е. (6 кл.), Ершов Ю. (5 кл.) II вырăна вара йышăнчĕç, III вырăна – Филиппова Е. (6 кл.), Лукина К. (7 кл.), Питимирова Э. (7 кл.).
6-7-мĕшсем класра вĕренекенсем хушшинче иртнĕ «Чăваш поэчĕсен сăввисене чи илемлĕ сăвă вулакан» конкурсра I вырăна 5-мĕш класри Матвеева Е., II Денисов Б. (5 класс), III Михайлова О. (5 класс), Селехметьева С. (6 класс) йышăнчĕç.
Халĕ Эйпеçсем ака уйăхĕн 30-мĕшĕнче иртекен «Пĕтĕм чăваш диктанчĕ – 2021» акцие хатĕрленеççĕ.