Ака уйăхĕн 30-мĕшĕнче Йĕпреçри тĕп библиотекăра «Элкер вулавĕсем – 2022» наукăпа практика конференцийĕ иртрĕ. Кăçалхи конференцие йĕркелекенсем Мухтавлă ентешсен çулталăкне халалларĕç. Вĕренекенсем хăйсен ăталăхне тĕрлĕ номинацире кăтартса пачĕç. Уйрăмах Йĕпреçри №1, №2, Чăваш Тимеш, Кĕлĕмкасси, Пучинке, Эйпеçри пĕтĕмĕшле пĕлÿ паракан вăтам тата Çăкалăх, Пысăк Упакасси, Энтриел шкулĕсенчи 20 вĕренекен хастар хутшăнчĕç.

  Эйпеç шкулĕнчен 10-мĕш класра вĕренекен Анжела Ильина (вĕрентекенĕ Школьникова Л.П.) «Автор поэзийĕ» номинацире хутшăнса I вырăн йышăнма пултарчĕ. Вăл Мухтавлă ентешсене халалланă сăввисене вуланине (А.Г.Николаев, И.Я.Яковлев, К.В.Иванов, Çеçпĕл Мишши, Çемен Элкер çинчен çырнă вăл) жюри членĕсем киленсе итлесе ларчĕç. Уйрăмах Йĕпреç районĕн Мухтавлă ентешĕ çинчен вуланине итлеме пурне те кăмăллă пулчĕ.

   Юлашкинчен Пысăк Упакасси шкулĕнче Элкер ячĕллĕ музей ертÿçи Раиса Афансьевна Евграфова, вăлах наукăпа практика конференцине йĕркелекенĕ,  пурне те тав сăмахĕ каларĕ: вĕренекенсене те, вĕрентекенсене те. Çĕнтерÿçĕсемпе призерсене Дипломсем парса чыс турĕ.